Surxondaryo viloyati hokimi Ulug‘bek Qosimov Termiz shahrida sovuq ob-havo sharoitida aholi hamda ijtimoiy soha obyektlarini energiya resurslari bilan barqaror ta’minlash, shuningdek, yo‘llarda yuzaga kelayotgan muzlamalarni bartaraf etish bo‘yicha amalga oshirilayotgan tezkor chora-tadbirlar bilan tanishdi.
O‘rganishlar davomida viloyat rahbari barcha sohalarda tashkil etilgan tezkor brigadalar shayligini ta’minlash, avariyaviy holatlarga zudlik bilan javob qaytarish tizimini kuchaytirish zarurligini ta’kidladi. Mas’ul idoralarga yo‘llarni muzlamalardan tozalash, qum-tuz aralashmasi sepish hamda yo‘l-transport hodisalarining oldini olish bo‘yicha aniq vazifalar belgilandi.
Shuningdek, aholi va ijtimoiy soha obyektlarini elektr energiyasi, tabiiy gaz, ichimlik suvi va yoqilg‘i bilan uzluksiz ta’minlash, mahallalarda yuzaga kelayotgan muammolarni joyida va tezkor hal etish masalalariga alohida e’tibor qaratildi. Ta’lim muassasalarida o‘quvchilar va talabalarning xavfsizligi hamda o‘quv xonalarining me’yoriy haroratda bo‘lishi qat’iy nazoratga olindi.
Mazkur chora-tadbirlar sovuq ob-havo sharoitida aholi hayoti va kundalik faoliyatining barqarorligini ta’minlash, favqulodda holatlarning oldini olishda muhim ahamiyat kasb etadi.
