Muzrabot tumanida yoshlarga bag‘ishlangan yangi ezgu tashabbus — “Yoshlar turizm ko‘chasi” tantanali ravishda foydalanishga topshirildi. Tadbirda tuman hokimi o‘rinbosari F.Raxmonov, nuroniy otaxonlar, yoshlar, soha mutasaddilari va keng jamoatchilik vakillari ishtirok etdi.
Ochilish marosimida so‘zga chiqqanlar yoshlarga yaratilayotgan keng imkoniyatlar, ularning iqtidorlarini ro‘yobga chiqarish, bo‘sh vaqtlarini mazmunli tashkil etish borasida olib borilayotgan keng ko‘lamli ishlar haqida ta’kidladilar. Rasmiy lenta kesilishi bilan yangi ko‘cha faoliyat boshladi va mehmonlar ko‘chma do‘konlar, hunarmandlar burchagi hamda yoshlar uchun mo‘ljallangan dam olish maskanlari bilan yaqindan tanishdilar.
Tadbir davomida chiroyli kuy-qo‘shiqlar, o‘yin-kulgu va ko‘tarinki ruh hukm surdi. Yoshlar o‘z iste’dodlarini namoyish qilib, bayramona kayfiyat ulashdilar.
“Yoshlar turizm ko‘chasi” loyihasi yoshlar orasida turizmga qiziqishni oshirish, ularning tashabbuskorligini rag‘batlantirish va hududda sog‘lom madaniyat hamda muhitni shakllantirishga xizmat qiladi. Bu tashabbus hududning ijtimoiy-madaniy hayotini boyitib, yoshlar uchun yangi imkoniyatlar eshigini ochmoqda.
