O‘ziga ishongan, bilimini muntazam boyitadigan, shuningdek, o‘z kasbini sevadigan o‘qituvchi uchun hech bir to‘siq uni egallab turgan lavozimidan ham, yosh avlodga sifatli ta’lim-tarbiya berishdek maqsadidan ham aslo chalg‘ita olmaydi. Balki cho‘chitmaydi ham. Sinovlardan, ayniqsa, attestatsiyadan mardonavor o‘tishga intiladi. Sababki, sinovlar kishini sinash barobarida sohasining bilimdoni va haqiqiy egasi ekanligini belgilab beruvchi mezondir. Joriy yilning bahor oylarida pedagog xodimlar uchun bahorgi attestatsiyalar belgilangan
bo‘lib, ayni vaqtda kadrlarning tayyorgarlik ko‘rishi maqsadida viloyat Maktabgacha va maktab ta’limi boshqarmasi tomonidan umumiy o‘rta ta’lim muassasalari pedagoglari uchun o‘quv-amaliy seminarlar tashkil etib borilmoqda.
Bunda 2024-yil o‘tkazilgan attestatsiyalarda 90 va undan yuqori ball to‘plab, oliy toifani olgan mahoratli pedagoglar tomonidan treninglar o‘tilyapti. Seminarlar tuman (shahar)lardagi tayanch maktablarda barcha fanlardan tashkil etilib, o‘qituvchilarga namunaviy test savollari, shuningdek, dasturning texnik tomonlari bilan tanishish imkoniyati ham yaratilgan.
A.Safarova
