Respublika kuchli o‘nligi safida…

O‘qituvchi lider, tashabbuskor bo‘lsa, boshqalarni o‘ziga ergashtira olsa, demak bunday pedagoglar yoshlar taqdiriga befarq emas va ulardan ko‘p narsalarni kutish mumkin. Vohamizda ana shunday jonkuyar, fidoyi kadrlar ko‘plab topiladi. Bo‘lib o‘tadigan tanlov va tadbirlar esa ularni kashf etishga, jamiyatda ana shunday insonlar borligini eslatib qo‘ygandek bo‘ladi. Poytaxtimizda Ixtisoslashtirilgan taʼlim muassasalari agentligi tizimidagi maktablar o‘qituvchilari o‘rtasida bo‘lib o‘tgan “Lider o‘qituvchilar” hamda o‘quvchilar o‘rtasida “Robo-Coding” olimpiadasi ham ayni maqsadga xizmat qildi.
Ushbu tanlovlarda surxondaryolik o‘qituvchi va o‘quvchilar ham faol ishtirok etdi. Bilim va salohiyatlar, dunyoqarashlar sinovi beiz ketmadi, Termiz shahridagi Prezident maktabining kimyo fani o‘qituvchisi Sadriddin Xolmatov hamda Denov tumanidagi 2-son ixtisoslashtirilgan maktabining kimyo fani o‘qituvchisi Davron Yusupovlarning bilim va malakalari yuqori baholanib, ular kimyo fani bo‘yicha Ixtisoslashtirilgan ta’lim muassasalari agentligi tizimidagi o‘qituvchilarning respublika bo‘yicha kuchli o‘nligidan o‘rin egallashdi. O‘qituvchilarimizga kimyo fani kengashi a’zoligiga qabul qilinganliklari bo‘yicha maxsus sertifikatlar topshirildi.