Mahalla obodligi, avvalo, odamlar kundalik hayotida seziladigan qulaylik va xavfsizlikda namoyon bo‘ladi. Bandixon tumanidagi Birdamlik mahallasida amalga oshirilayotgan yangi loyiha ham aynan shu maqsadga xizmat qilmoqda. “Og‘ir mahalla” sifatida tanlangan hududdan o‘tuvchi D167 avtomobil yo‘li bo‘yida qiymati 1,7 milliard so‘mlik, uzunligi 4,6 kilometr bo‘lgan zamonaviy piyodalar yo‘lakchasi barpo etilmoqda.
Ayni paytda uning qariyb 1 kilometrlik qismi foydalanishga topshirilib, o‘quvchilar, yoshlar va mahalla aholisi undan foydalanishni boshladi. Eng muhimi, yangi yo‘lak piyodalar uchun shunchaki qulaylik emas, balki avtomobil yo‘li bo‘ylab harakatlanishda xavfsizlikni ta’minlaydigan muhim infratuzilma hisoblanadi.
Loyiha to‘liq yakunlangach, Birdamlik mahallasining qiyofasi yanada obodlashib, aholining xavfsiz va qulay harakatlanishi uchun yangi imkoniyat yaratiladi.
