Yo‘l infratuzilmasini yaxshilash hududlarni kompleks rivojlantirish, aholi uchun qulay va xavfsiz transport qatnovini ta’minlashning muhim omillaridan biridir. Shu maqsadda Bandixon tumanida navbatdagi yo‘l qurilishi loyihasi amalga oshirilmoqda.
Tumandagi mahalliy ahamiyatga ega 75V089-sonli “Oybek qishlog‘i – Bandixon Shreder ilmiy-tadqiqot xo‘jaligi” avtomobil yo‘lining Bandixon, Bahoriston, Gulbog‘ va Qaldirg‘och mahallalari hududidan o‘tuvchi 13 kilometrlik qismida asfaltlash ishlari boshlandi.
Tuman hokimi Abdumalik Allamuradov qurilish jarayonini ko‘zdan kechirib, mas’ullarga ishlarni sifatli va belgilangan muddatlarda yakunlash yuzasidan tegishli topshiriqlar berdi.
Ushbu loyiha mahallalar o‘rtasidagi transport qatnovini yaxshilash, minglab fuqarolar uchun qulaylik yaratish hamda hududning ijtimoiy-iqtisodiy rivojlanishiga munosib hissa qo‘shishi bilan ahamiyatlidir.
