Yoshlarni zamonaviy bilim va ko‘nikmalar bilan qurollantirish, ularning ta’lim olishi uchun sharoit yaratish — bugungi kunning muhim vazifalaridan biridir. Denov tumani bu yo‘nalishda navbatdagi muhim qadamni qo‘ydi.
Denov tumani hokimi Anvar Normamatov boshchiligida nuroniylar, yoshlar va jamoatchilik ishtirokida “Buyuk Ipak yo‘li” mahallasida yangi o‘quv markazining tantanali ochilish marosimi bo‘lib o‘tdi.
Markaz tashabbuskor Umirov Abdulloning tashabbusi bilan Yoshlar ishlari agentligi ajratgan 130 million so‘mlik subsidiya mablag‘i hisobidan tashkil etildi. Ingliz tili fani bo‘yicha oliy ma’lumotga ega tashabbuskor markazda barcha zarur shart-sharoitlarni yaratdi.
O‘quv markazida ingliz tili, matematika, kimyo va biologiya fanlari bo‘yicha malakali pedagoglar tomonidan mashg‘ulotlar olib boriladi. Bu yerda yoshlarning bilimini oshirish, oliy ta’lim muassasalariga puxta tayyorlash va zamonaviy kasbiy ko‘nikmalarni shakllantirishga alohida e’tibor qaratiladi.
Tadbirda yoshlarni qo‘llab-quvvatlash va ta’lim sohasidagi ijobiy tashabbuslarning ahamiyati alohida ta’kidlandi.
