Iqtisodiy barqarorlikni ta’minlash va tadbirkorlik muhitini yanada yaxshilashda to‘lovga qobiliyatsizlik jarayonlarini samarali boshqarish muhim ahamiyat kasb etadi. Zamonaviy va shaffof tizim esa ushbu sohada ortiqcha byurokratiyani kamaytirib, huquqiy mexanizmlarni takomillashtirishga xizmat qiladi.
Shu maqsadda Prezidentning “To‘lovga qobiliyatsizlik institutini yanada takomillashtirish chora-tadbirlari to‘g‘risida”gi farmoni qabul qilindi. Unga ko‘ra, Adliya vazirligi huzurida To‘lovga qobiliyatsizlik ishlari agentligi hamda uning hududiy bo‘limlari tashkil etiladi.
Mazkur agentlik sohada yagona davlat siyosatini yuritish, davlat organlari faoliyatini muvofiqlashtirish hamda to‘lovga qobiliyatsizlik jarayonlarini to‘liq raqamlashtirish bilan shug‘ullanadi. Shuningdek, O‘zbekiston Sud boshqaruvchilari palatasi tashkil etilib, sud boshqaruvchilarining yagona o‘zini o‘zi boshqarish tizimi yo‘lga qo‘yiladi. Bu yangiliklar sohada ochiqlik, samaradorlik va zamonaviy boshqaruvni ta’minlashga xizmat qiladi.
