Maktabgacha ta’lim tizimi — jamiyat taraqqiyotining ilk va eng muhim poydevoridir. Aynan shu bosqichda bolalarda bilimga qiziqish, ijodkorlik va shaxsiy fazilatlar shakllanadi. Shu bois tarbiyachilarning kasbiy mahoratini oshirish va ilg‘or tajribalarni ommalashtirish dolzarb ahamiyat kasb etadi.
Surxondaryo viloyatida “Yilning eng yaxshi tarbiyachisi” kasbiy ko‘rik-tanlovining viloyat bosqichi boshlandi. Termiz shahridagi 26-maktabda tanlovning ilk sharti — test sinovlari o‘tkazilib, unda hududlardan saralab olingan 80 nafar ishtirokchi o‘z bilim va salohiyatini namoyish etmoqda.
Tanlov davlat va nodavlat maktabgacha ta’lim tashkilotlari kesimida bir nechta yo‘nalishlar bo‘yicha tashkil etilgan bo‘lib, unda innovatsion yondashuv, ijodkorlik, ma’naviy tarbiya va bolalar bilan ishlashdagi ilg‘or usullar asosiy mezon sifatida baholanadi.
Mazkur tanlov nafaqat eng yaxshi tarbiyachilarni aniqlash, balki sohada sifat va samaradorlikni oshirishga xizmat qilishi bilan ham ahamiyatlidir.
