“Boysun bahori” xalqaro folklor festivali nafaqat milliy urf-odatlar, qo‘shiq va raqslar namoyishi, balki sport tadbirlari orqali ham yanada boyitilmoqda. So‘nggi yillarda festival dasturiga yoshlar, ayniqsa qizlar faolligini oshirish maqsadida sport musobaqalari ham kiritilib kelinmoqda.
Festival doirasida Boysun va Qumqo‘rg‘on tumanlari qizlari o‘rtasida futbol uchrashuvi o‘tkazildi. Qiziqarli va murosasiz kechgan bahs penaltilar seriyasiga qadar davom etib, unda Boysun tumani jamoasi g‘alaba qozondi. G‘oliblarga diplom, medal va esdalik sovg‘alari topshirildi.
Tadbirlar Boysun tumani Bibishirin mahallasida joylashgan “Boysun bahori” turizm markazida ko‘tarinki ruhda davom etmoqda. Festivalning bunday yo‘nalishda kengayib borishi yoshlar faolligini oshirish, sog‘lom turmush tarzini targ‘ib qilish hamda hududning turizm salohiyatini yanada yuksaltirishga xizmat qilmoqda.
