Yosh avlodni harbiy-vatanparvarlik ruhida tarbiyalash, ularni yurt himoyasiga sadoqatli qilib voyaga yetkazish bugungi kunning muhim vazifalaridan biridir. Shu maqsadda Surxondaryo viloyatining chegaraoldi hududlarida joylashgan maktab o‘quvchilari o‘rtasida “Yosh chegarachilar” musobaqasi o‘tkazilmoqda.
Musobaqaning viloyat bosqichida Davlat xavfsizlik xizmati Chegara qo‘shinlari vakillari, faxriylar hamda jamoat tashkilotlari ishtirok etdi. Unda Qumqo‘rg‘on tumanidagi 50-sonli umumta’lim maktabining “Sarhad” jamoasi raqib jamoalar bilan 16 ta shart asosida bellashdi. Qizg‘in va murosasiz kechgan bahslar yakunida jamoa faxrli 1-o‘rinni egallab, respublika bosqichiga yo‘llanma oldi. Keyingi o‘rinlar mos ravishda Jarqo‘rg‘on tumani va Uzun tumani jamoalariga nasib etdi.
G‘oliblar diplom, esdalik sovg‘alari va ko‘chma kubok bilan taqdirlandi. Bu kabi musobaqalar yoshlarning jismoniy va ma’naviy tayyorgarligini oshirish, ularda vatanparvarlik, jasorat va jamoaviylik tuyg‘ularini mustahkamlashda muhim ahamiyat kasb etadi.
