Surxondaryo viloyati hokimining tashabbusi bilan “Taraqqiyot va yetakchilik maskani” dasturi doirasida Termiz tumanidagi yana beshta mahallada infratuzilmani yaxshilash, aholi turmush darajasini oshirishga qaratilgan bunyodkorlik ishlari amalga oshirilmoqda.
Viloyat hokimi Ulug‘bek Qosimov mazkur mahallalarda olib borilayotgan ishlar bilan tanishdi. Jumladan, elektr ta’minoti tarmoqlarini modernizatsiya qilish, ichimlik suvi tizimini kengaytirish, ichki yo‘llarni ta’mirlash, piyodalar yo‘laklarini barpo etish hamda M–41 avtomagistrali bo‘ylab zamonaviy shaharsozlik qiyofasini shakllantirish masalalari muhokama qilindi.
O‘rganishlar jarayonida “Yangi O‘zbekiston qiyofasidagi mahalla” konsepsiyasi asosida kommunal xizmatlar sifatini oshirish, beshta mahallani to‘liq qamrab olgan holda aholi uchun zarur infratuzilma va xizmatlarni yaratish bo‘yicha vazifalar belgilab berildi.
