Denov shahrida yashovchi, 1993-yilda tug‘ilgan, muqaddam sudlangan shaxs Tojikiston Respublikasining 1993-yilda tug‘ilgan fuqarosini noqonuniy ravishda tutqunlikda ushlab kelgani aniqlandi.
Ma’lum bo‘lishicha, u Dushanbe shahrida yashovchi tanishiga 11 ming AQSH dollari bergan va qarz o‘z vaqtida qaytarilmagani sababli uning sherigini garov sifatida Denovda ushlab turgan. Jabrlanuvchi turli qiynoqlarga solinib, og‘ir tan jarohati yetkazilgan.
Holat yuzasidan gumonlanuvchiga nisbatan jinoyat ishi qo‘zg‘atilib, qamoq ehtiyot chorasi qo‘llanildi.
