Surxondaryo viloyati hokimi joriy yil uchun mavjud imkoniyatlar va ehtiyojlardan kelib chiqib, davlat dasturlaridan tashqari 52 ta ijtimoiy soha obyektini rekonstruksiya qilish ishlariga start berdi. Xususan, ushbu tashabbus doirasida Termiz tumanidagi 15- va 28-sonli umumta’lim maktablari mahalliy byudjet mablag‘lari hisobidan rekonstruksiya qilinadi. Har ikki maktabda 320 o‘rinli o‘quv binolari joriy ta’mirdan chiqarilishi rejalashtirilgan.
Tuman hokimi Shuxrat Qalandarov 28-sonli maktabda bo‘lib, o‘quv binolari, sinf xonalari hamda yordamchi infratuzilma obyektlarining holatini joyida o‘rgandi. O‘rganish jarayonida mas’ullarga ta’mirlash ishlarini belgilangan muddatlarda va yuqori sifatda bajarish, shuningdek, o‘quv xonalarini zamonaviy talablar asosida jihozlash bo‘yicha aniq topshiriqlar berildi.
Mazkur ishlar ta’lim muassasalarida o‘quvchilar uchun yanada qulay va zamonaviy sharoitlar yaratishga xizmat qiladi.
