Mamlakatimiz bo‘ylab keng quloch yozgan “Yashil makon” umummilliy loyihasi doirasida Denov tadbirkorlik va pedagogika instituti jamoasi tomonidan xayrli va istiqbolli tashabbus amalga oshirildi. Tadbirda Denov tumani hokimi Anvar Normamatov ishtirok etib, ushbu ezgu tashabbusning ahamiyati haqida to‘xtaldi va bog‘ning ilk daraxtlarini ekishda shaxsan qatnashdi. Shuningdek, jarayonda institut rahbariyati, professor-o‘qituvchilar, faol xodimlar hamda g‘ayratli talaba-yoshlar ishtirok etdi.
Bog‘ning tarkibi va ilmiy ahamiyati: Yangi barpo etilgan bog‘da manzarali va mevali daraxtlarning noyob turlari jamlandi. Xususan: hudud atrofini o‘rab turuvchi 3 qator archalar; mevali ko‘chatlar: olma, anor, anjir va behi; gullardan: hind sireni, atirgul, hamishabahor va lolalar ekilib, hudud haqiqiy bo‘stonga aylantirildi.
Aytish joizki, ushbu maydon kelajakda institutning biologiya yo‘nalishi talabalari uchun o‘ziga xos “Tajriba maydoni” vazifasini ham o‘taydi. Bu yerda yoshlar nazariy bilimlarini amaliyot bilan bog‘lash imkoniyatiga ega bo‘ladilar.
