Raqamlar aniq, ma’lumot to‘liq bo‘ladi

Hech bir davlatning ijtimoiy-iqtisodiy rivojlanishini aniq statistik ma’lumotlarsiz tasavvur qilib bo‘lmaydi. Shu munosabat bilan, o‘tkazilishi rejalashtirilgan aholi va qishloq xo‘jaligini ro‘yxatga olish tadbirlari mamlakatimiz uchun tarixiy ahamiyatga ega jarayondir.Ro‘yxatga olishning asosiy bosqichi 2026-yilning 15-yanvaridan 28-fevraliga qadar davom etadi. Bu davr mobaynida nafaqat aholi soni va demografik ko‘rsatkichlari, balki respublikamiz iqtisodiyotining ustuvor yo‘nalishi bo‘lgan qishloq xo‘jaligi sohasi ham to‘liq xatlovdan o‘tkaziladi.
Bu jarayon bizga nima beradi?
Aholini ro‘yxatga olish natijasida hududlarda kimlar yashashi, ularning yoshi, jinsi va ta’lim darajasi haqida aniq raqamlar paydo bo‘ladi. Bu ma’lumotlar kelgusi 10–20 yil ichida qayerda yangi bog‘cha, maktab yoki shifoxona qurish zarurligini, qaysi hududlarda yangi ish o‘rinlariga ehtiyoj yuqoriligini aniqlashda asosiy qo‘llanma bo‘ladi. Qishloq xo‘jaligini ro‘yxatga olish orqali yer resurslari, ekin maydonlari, bog‘lar va chorva mollarining bosh soni bo‘yicha shaffof baza yaratiladi. Bu esa ichki bozorda narx-navo barqarorligini ta’minlash va eksport salohiyatini to‘g‘ri baholash imkonini beradi.
Bu safargi jarayonlarda zamonaviy axborot texnologiyalari va planshetlardan keng foydalanish ko‘zda tutilgan. Bu inson omilini kamaytirib, ma’lumotlarning haqqoniyligi va tezkorligini ta’minlaydi.
Ko‘pchilikni o‘ylantiradigan muhim jihat — shaxsiy ma’lumotlarning xavfsizligidir. Ta’kidlash joizki, ro‘yxatga olish jarayonida olingan barcha ma’lumotlar qat’iy ravishda shaxsiy sir saqlanadi va ulardan faqat umumlashtirilgan statistik maqsadlarda foydalaniladi.
Boshlanajak bu muhim tadbirda faol ishtirok etish — har bir fuqaroning o‘z kelajagiga va farzandlari farovonligiga qo‘shgan hissasidir. Zero, aniq raqamlar — to‘g‘ri qarorlar va farovon turmush asosidir.