Qumqo‘rg‘on tumanida “Tashabbusli byudjet” loyihasi doirasida aholining taklifi bilan qurilgan yangi tez tibbiy yordam bo‘limi foydalanishga topshirildi. Tadbirda viloyat hokimi Ulug‘bek Qosimov, soha mutasaddilari va mahalla faollari ishtirok etib, yangi binoda yaratilgan sharoitlar bilan tanishdi.
Mazkur bo‘lim aholiga tezkor va sifatli tibbiy xizmat ko‘rsatishni yo‘lga qo‘yish, shoshilinch holatlarda inson hayotini saqlab qolish imkoniyatlarini kengaytirishda muhim ahamiyat kasb etadi.
Shuningdek, hokim mahalliy byudjet hisobidan ta’mirlangan Ko‘p tarmoqli markaziy poliklinikadagi ishlar bilan ham tanishib, tibbiyot xodimlariga sog‘lom turmush tarzini targ‘ib qilish va profilaktika ishlarini kuchaytirish bo‘yicha topshiriqlar berdi.
