Musiqa terapiya assotsiatsiyasi tashkil etiladi

O‘zbekistonda musiqa terapiya sohasini rivojlantirish va uning zamonaviy tibbiyotdagi o‘rnini mustahkamlash maqsadida “O‘zbekiston musiqa terapiya assotsiatsiyasi” jamoat birlashmasi tashkil etilmoqda.
Mazkur tashabbus Yunus Rajabiy nomidagi O‘zbekiston milliy musiqa san’ati instituti (O‘zMMSI) tomonidan ilgari surilgan bo‘lib, institut rektori v.b. Eldor Shermanov hamda O‘zbekiston nodavlat notijorat tashkilotlari milliy assotsiatsiyasi raisi Kamoliddin Ishanxo‘jayev o‘rtasidagi uchrashuv chog‘ida bu masala atroflicha muhokama qilindi.
Muloqotda musiqa terapiyasining ijtimoiy-madaniy ahamiyati, uni rivojlantirishning amaliy mexanizmlari hamda nodavlat sektor bilan samarali hamkorlikni yo‘lga qo‘yish masalalari ko‘rib chiqildi.
Mazkur tashabbus sog‘lom turmush tarzini targ‘ib etish, inson ruhiyatiga ijobiy ta’sir ko‘rsatuvchi madaniyat va san’at yo‘nalishlarini qo‘llab-quvvatlash borasida muhim qadam bo‘lishi kutilmoqda.