Termiz shahri yana bir bor yurtimiz sport hayotining markaziga aylandi. “Uzbekistan Judo Tour” doirasidagi musobaqalarning oltinchi bosqichi Surxondaryoda tashkil etildi. Bellashuvlar Termiz shahridagi viloyat Yakkakurash sport turlariga ixtisoslashtirilgan sport maktabida bo‘lib o‘tdi. Tatami ustida O‘zbekistonning deyarli barcha hududlaridan kelgan 169 nafar dzyudochi o‘zaro kuch sinashdi.
200 million so‘m miqdoridagi mukofot jamg‘armasiga ega bo‘lgan ushbu nufuzli musobaqada erkaklar o‘rtasida -66 kg, -81 kg va +90 kg, ayollar o‘rtasida esa +70 kg vazn toifalarida g‘olib va sovrindorlar aniqlandi.
Musobaqa davomida sportchilar nafaqat jismoniy kuch, balki yuksak texnika, matonat va iroda namoyon qilishdi. Yakunda eng yaxshi natija ko‘rsatgan dzyudochilarga diplom va pul mukofotlari topshirildi.
