1-oktyabr — O‘qituvchi va murabbiylar kuni munosabati bilan Termiz davlat universiteti jamoasi uchun unutilmas bayram tadbiri tashkil etildi. Ushbu qutlug‘ sana munosabati bilan shahrimiz markazidagi “Serenada” tantanalar saroyi ko‘tarinki ruh, iliq tabassumlar va chin yurakdan yangragan minnatdorchilik so‘zlariga to‘ldi.
Tadbirda TerDU rektori A. Toshqulov ishtirok etib, ustozlarni samimiy tabrikladi. U ta’lim-tarbiya yo‘lida fidokorona xizmat qilayotgan muallimlarning mashaqqatli mehnati va jamiyatdagi beqiyos o‘rnini alohida e’tirof etdi.
Bayram dasturining eng e’tiborga molik jihati shundaki, sahnadagi barcha badiiy chiqishlar universitetning iste’dodli talabalari va ijodiy jamoalari tomonidan taqdim etildi. Ayniqsa, Olim aka taxallusi bilan tanilgan o‘qituvchi va “Jayhun” folklor-etnografik jamoasining milliy ruhdagi chiqishlari tadbirga alohida fayz bag‘ishladi.
Tadbir yakunida esa barcha ishtirokchilarga bayram sovg‘alari topshirildi.
