Yurtimizda ta’lim sohasiga qaratilayotgan e’tibor va amalga oshirilayotgan keng ko‘lamli islohotlar natijasida har bir hududda yangi maktablar, qo‘shimcha o‘quv binolari, zamonaviy dars xonalari barpo etilmoqda. Bu esa yosh avlodning keng dunyoqarashli, bilimli va ma’naviy barkamol bo‘lib voyaga yetishida mustahkam poydevor bo‘lib xizmat qilmoqda.
Sariosiyo tumani, “Boysunobod” mahallasidagi 6-sonli umumta’lim maktabida ham ana shunday ezgu ishlarning amaliy samarasini ko‘rish mumkin. Bu yerda qo‘shimcha 480 o‘rinli zamonaviy o‘quv binosi barpo etilib, foydalanishga topshirildi. Mazkur loyiha uchun 2 milliard 190 million so‘m mablag‘ yo‘naltirildi.
Yangi bino ochilishi o‘quvchilar hayotida haqiqiy bayram bo‘ldi. Endilikda ular yorug‘, keng va zamonaviy sinfxonalarda ta’lim olish, turli to‘garaklarga qatnash, bilimini yanada mustahkamlash imkoniyatiga ega bo‘ladilar.
O‘quvchilarning ko‘zidagi quvonch, yuzlaridagi samimiy tabassum ularning kayfiyatidan yaqqol sezilib turardi. “Endi darslarimiz yanada maroqli va qiziqarli bo‘ladi”, — deya hayajonini yashirmaydi maktab o‘quvchilari. Yangi bilim maskani nafaqat ta’lim sifati, balki kelajak avlodning orzu-intilishlari uchun ham mustahkam poydevor bo‘lib xizmat qiladi. Zero, zamonaviy maktab — kelajak sari dadil qadam, yoshlarda yuksak bilim va tafakkurni shakllantirishning eng muhim omilidir.
