Havo hujumidan mudofaa qo‘shinlari va Harbiy havo kuchlari qo‘mondonligining samo lochinlari “Xalq va armiya – bir tan-u bir jon” degan ulug‘vor g‘oya ostida Sariosiyo tumanining “Xufar” mahallasi fuqarolarini toza ichimlik suvi bilan ta’minlashda o‘z hissasini qo‘shmoqda.
Xususan, tuman markazidan 40 kilometr uzoqlikda, dengiz sathidan 1500 metr balandlikda joylashgan ushbu chekka hududga ichimlik suvi tortish uchun zarur bo‘lgan quvurlar, texnik vositalar va boshqa mahsulotlar harbiy aviatsiya vositalari yordamida havo yo‘li orqali muvaffaqiyatli yetkazib berildi.
Ushbu ezgu tashabbus, mamlakatimiz qurolli kuchlari nafaqat yurt tinchligi va sarhadlar daxlsizligini himoya qilish, balki xalqimiz farovonligini ta’minlash yo‘lida ham sidqidildan xizmat qilayotganini yana bir bor namoyon etdi.
Harbiy-havo kuchlarining bu kabi tashabbuslari, armiya bilan xalq o‘rtasidagi uzviy bog‘liqlik, o‘zaro ishonch va hamkorlikning yorqin ifodasidir.
