Ertadan yangi oʻquv yili boshlanadi. Oʻquvchi-yoshlarning quvonch-u hayajoni cheksiz. Albatta, darslar, oʻquv jarayoni xavfsiz, tartibli tashkil etilishi xotirjamlik garovidir. Ayni maqsadda hukumatning ta’lim muassasalarida yangi o‘quv yilini xavfsiz va tartibli tashkil etishga oid topshiriqlari doirasida Surxondaryo viloyati hokimi Ulug‘bek Qosimov Termiz shahridagi qator maktablarda tayyorgarlik holatini o‘rgandi.
Tekshiruv jarayonida yong‘in va favqulodda holatlar, yo‘l harakati xavfsizligi, shuningdek, maktablardagi “Tashvish tugmalari”ning ishlashi sinovdan o‘tkazildi. Tegishli xizmatlarning yetib kelish vaqti hamda maktab atrofida harakat xavfsizligini ta’minlash choralari ko‘rib chiqildi.
Shu bilan birga, 2-sonli maktabda binoni pardozlash va jihozlash ishlari bilan tanishildi. Mutasaddilarga ishlar sur’atini jadallashtirish, ta’lim sifati, yong‘in va yo‘l xavfsizligini ta’minlash bo‘yicha aniq vazifalar yuklatildi.
