“Akademik S. Y. Yunusov” nomidagi O‘simlik moddalari kimyosi instituti tomonidan yaratilgan “Parkinson kasalligini davolash uchun vosita” nomli ixtiro davlat ro‘yxatidan o‘tkazildi. Adliya vazirligining ma’lum qilishicha, ushbu vosita tarkibida tikanakli kavar (Capparis spinosa L.) kurtaklari va pishmagan mevalaridan olingan ekstrakt mavjud bo‘lib, uning asosiy komponentlari polisaxaridlar (30–35%), flavonoidlar (5–10%) hamda suvda eruvchan oqsillar (20–25%)dan iborat.
Vosita Parkinson kasalligining oldini olish va davolashda qo‘llaniladi hamda kam nojo‘ya ta’sirga ega. Eslatish joizki, parkinson kasalligi — markaziy asab tizimining surunkali xastaligi bo‘lib, titroq, qotib qolish, harakat cheklanishi kabi belgilar bilan kechadi.
