O‘zbekiston Respublikasi Maktabgacha va maktab taʼlimi vazirligi tomonidan maktabgacha yoshdagi bolalarda sog‘lom turmush tarzi, gigiyena va xavfsizlik madaniyatini shakllantirishga qaratilgan “Salomatlik alifbosi” nomli o‘quv-didaktik qo‘llanmalar to‘plami ishlab chiqildi.
To‘plam bolalar salomatligi va gigiyenasi, mening tanam, sog‘lom va xavfsiz ovqatlanish, jismoniy faollik, xavfsizlik qoidalari kabi 5 muhim yo‘nalishni qamrab oladi. Qo‘llanmalar o‘zbek, qoraqalpoq va rus tillarida tayyorlangan bo‘lib, maktabgacha taʼlim pedagoglari uchun metodik asos sifatida xizmat qiladi. Har bir bo‘lim mashg‘ulotlar, suhbatlar, interaktiv faoliyatlar orqali bolalarda sog‘lom hayotga oid dastlabki tushunchalarni shakllantirishga yo‘naltirilgan. Loyihalar “Mercy Corps” xalqaro nodavlat tashkilotining O‘zbekistondagi filiali bilan hamkorlikda, “Bolalar ta’limi va ovqatlanishi uchun” dasturi doirasida amalga oshirildi.
Hozirda “Salomatlik alifbosi” to‘plami maktabgacha taʼlim tashkilotlariga yetkazilib, amaliyotda faol qo‘llanmoqda. Jumladan, Surxondaryo viloyatida 147 ta maktabgacha ta’lim tashkiloti mazkur to‘plam bilan ta’minlandi.
