Jarqo‘rg‘on tumanida aholini arzon va sifatli oziq-ovqat mahsulotlari bilan ta’minlash, shuningdek, fermer xo‘jaliklari iqtisodiyotini yanada mustahkamlash maqsadida joriy yilda g‘alladan bo‘shagan maydonlarda takroriy ekinlar ekilmoqda.
Takroriy ekin ekish agrotexnik qoidalarga amal qilgan holda, suv tejovchi texnologiyalar asosida olib borilayotgani, yerning unumdorligini saqlab qolish bilan birga, yuqori hosildorlikka erishish imkonini beradi. Shu orqali tuman agrar sohasi barqarorligi ta’minlanib, oziq-ovqat xavfsizligi yo‘lida yana bir muhim qadam tashlandi.
Tumanning “Minor Surxon Gavhari” hududida joylashgan “Zamin Oq Oltin” fermer xo‘jaligida ikkinchi hosil sifatida kartoshka ekish bosqichma-bosqich olib borilmoqda. Mazkur hududda ekilgan kartoshka nafaqat ichki bozorni sifatli mahsulotlar bilan ta’minlashga, balki mahalliy aholining bandligini oshirishga ham xizmat qilmoqda.
