Denov tumanida “Sog‘lom oila – sog‘lom millat uchun” shiori ostida xotin-qizlar o‘rtasida voleybol musobaqasi tashkil etildi. Sport tadbiri mahalla yoshlarini sog‘lom turmush tarziga jalb etish va ayollar o‘rtasida jismoniy faollikni oshirish maqsadida o‘tkazildi.
Musobaqada viloyat Oila va xotin-qizlar boshqarmasi, tuman Oila va xotin-qizlar bo‘limi boshliqlari, tuman xotin-qizlar faollari jamoasi, Denov tadbirkorlik va pedagogika instituti (DTPI) jamoasi hamda “Surxon” mahallasi ko‘chaboshilari jamoasi ishtirok etdi.
Qizg‘in va murosasiz kechgan bahslar natijasida Denov tadbirkorlik va pedagogika instituti jamoasiga 1-o‘rin nasib etdi. G‘olib va sovrindor jamoalarga diplom va esdalik sovg‘alari topshirildi. Tadbir ishtirokchilarda katta taassurot qoldirdi va bunday musobaqalarni muntazam tashkil etish zarurligi ta’kidlandi.
