Surxondaryo viloyatida ham “Kambag‘allikdan farovonlik sari” dasturi izchil amalga oshirilmoqda. Dastur ijrosi qay darajada ketayotganiga qiziqqan viloyat hokimi Ulug‘bek Qosimov Bandixon tumaniga tashrif buyurib, amalga oshirilayotgan ishlar bilan yaqindan tanishdi. Jumladan, “Chinor” mahalasida istiqomat qiluvchi fuqarolar Allamurod Avliyoqulov va Xo‘jamqul Mamayusupov tomonidan tomorqada archa ko‘chatlari va limon yetishtirish ishlari o‘rganildi.
Bundan tashqari, “Bektepa” mahalasida yashovchi oila misolida kambag‘allikdan chiqarishga qaratilgan chora-tadbirlar ko‘rib chiqildi. Shu mahallada joylashgan “Eko audit Surxon” MCHJga qarashli 1 gektar maydondagi zamonaviy issiqxona xo‘jaligida yaratilgan ish o‘rinlari hamda mahsulot yetishtirish jarayonlari bilan tanishuv bo‘lib o‘tdi.
Tashrif doirasida og‘ir toifadagi hudud sifatida belgilangan “Polvontosh” mahallasining sug‘orish tizimini yaxshilashga qaratilgan ishlar ham ko‘zdan kechirildi. Nuroniylar va mahalla faollari ishtirokida umumiy uzunligi 5 kilometr bo‘lgan beton ariqlar tarmog‘i foydalanishga topshirildi.
