Ko‘chat ekish, dehqonchilik qilish fazilati va ahamiyati ulug‘dir. Agar biror inson ekkan daraxt mevasi boshqalar tomonidan iste’mol qilinsa, garchi o‘sha daraxt vaqt o‘tib o‘zga odamning mulkiga aylansa ham uning haqiga savob yozilib turar ekan.
Qolaversa, tabiatning yanada ko‘rkam va atrof-muhitni toza-ozoda bo‘lishiga o‘z hissasini qo‘shadi. Bundan tashqari xalqimiz orasida “Ot izini toy bosadi” degan hikmatlli so‘z bor. Diyorbek Do‘stqobilov otasidan ibrat olib, ko‘chatchilikni davom ettirishni o‘z oldiga maqsad qildi. U Yurtboshimiz tashabbusi bilan aholiga berilayotgan imtiyozli kreditdan foydalanib, o‘z bandligini ta’minladi.
— “Jamatak” mahallamizda to‘rt mingdan ortiq aholi istiqomat qiladi, – deydi hokim yordamchisi Ulug‘bek Omonov. — Mahallamiz drayveri qishloq xo‘jaligi va chorvachilikka ixtisoslashgan. Yurtboshimizning tashabbuslari bilan tumanimizda ham “Sayhunobod tajribasi” asosida fuqarolarning ish bilan bandligini ta’minlash, turmush farovonligini yahshilash maqsadida qator ishlar olib borilmoqda.
Aytish joizki, hozirda 119 ga yaqin fuqaroga o‘z biznesini rivojlantirish maqsadida imtiyozli kreditlar ajratildi. Daromad olishni yo‘lga qo‘yishdi. Bundan tashqari yetmish nafar fuqaro issiqxona uchun va qirq to‘qqiz nafari gul ko‘chatlari yetishtirish maqsadida kredit olib hozirda fuqarolar ish boshladi. Yurtboshimizning ushbu tashabbuslaridan aholimiz mamnun, chunki ular Vatanida, o‘z oilasi bag‘rida ro‘zg‘ori but hayot kechirishmoqda.
D.Qo‘zimurotova
