Mahallada infratuzilma yaxshilansa…

Mahalla infratuzilmasini yaxshilash aholi hayotini farovonlashtirishga xizmat qiladi. Shu sabab, o‘zgarish va yangilanishlar aynan mahallalardan boshlanayotir. Amalga oshirilayotgan ishlarni nazorat qilish esa mas’ullar mas’uliyatini oshiradi.
Surxondaryo viloyati hokimi Ulug‘bek Qosimov Boysun tumani “Kofrun” mahallasida joylashgan Jiydali ota maqbarasidagi sharoitlarni ko‘zdan kechirib, mahallalarda infratuzilmani yaxshilash, aholi turmush farovonligini oshirish borasida olib borilgan ishlar bilan tanishdi.
Jumladan, shu maqsadlarda 34,5 kilometr avtomobil yo‘li ta’mirlandi, 51,8 kilometr elektr tarmog‘i tortilib, 9 ta transformator va 800 ga yaqin beton ustun o‘rnatildi, shuningdek, 26 km ichimlik suvi tarmog‘i yotqizilib, 2 ta suv saqlash inshooti qurildi. Bundan tashqari 4 ta maktab binosini ta’mirlash hamda 14 ta mahallani obodonlashtirish ishlari amalga oshirildi.
Tuman hokimi va qurilish sohasi mutasaddilari amalga oshirilgan ishlar yuzasidan axborot berdi. Shuningdek, mahalla “yettiligi”ning faoliyati yuzasidan hisobotlari tinglandi. Aholini tadbirkorlikka jalb qilish, yangidan qurilgan suv ombori imkoniyatlaridan foydalangan holda tomorqada mahsulot yetishtirish tajribasini oshirish yuzasidan tuman rahbariyati va mahallalar “yettiligi”ga vazifalar belgilab berildi.
Davlatimizning qaratayotgan e’tibori, amalga oshirayotgan tadbirlari uchun nuroniylar o‘z minnatdorligini bildirib, yurt tinchligi va osoyishtaligi hamda yangi yilning barokatli kelishini so‘rab duoga qo‘l ochdi.