Sport jismonan kuchli qilish bilan birga ruhiyatingizni, xulq-atvoringiz, fe’lingizni ham toblaydi. Sportchilarning, polvonlarning mard va tanti bo‘lishining boisi ham shunda. Bugungi kunda barcha sport turlari ommalashib, yoshlarning kuch va mahoratlari sinovdan o‘tkazilayotgan bir paytda har bitta mahalladan saralangan kuchli kurashchilar Toshkent shahridagi Universal sport saroyida “Besh tashabbus olimpiadasi” doirasidagi kurash bo‘yicha “Bosh prokuror kubogi” musobaqasining hal qiluvchi final bahslarida kuch sinashdi.Polvonlarning davraga chiqishi, gilamga tushishi-yu kurash jarayonlari katta qiziqish bilan kuzatib borildi. Kurash qizg‘in va murosasiz tus oldi. Musobaqaning +90 kilogramm vaznda ishtirok etgan jarqo‘rg‘onlik polvoni Abduraxmon Yusupov barcha raqiblarining kuragini yerga tekkazib, halol 1-o‘rinni egalladi.Albatta, ushbu kurash musobaqasida Abduraxmon Yusupov kabi surxondaryolik yosh kurashchilarimiz katta marralarni ko‘zlab, niyatlariga yetishdi. Bir emas, yetti nafar polvonlarimiz or uchun davraga tushib, 6 ta oltin va 1 ta bronza medal bilan respublikada 1-o‘rinni egalladi.
Nargiza Musayeva
