Kimki bog‘cha yoki maktab qurib, uning ortidan yuqori daromad ko‘rish mumkin desa, hech ikkilanmasdan bekorlarning beshtasini aytibsan deyavering. Sababi, yosh avlodning ta’lim-tarbiya olishi uchun qurilayotgan maskanlarni bunyod etish ortida hech qanday moliyaviy biznes turmaydi, tursa ham yoshlarning zamonaviy shart-sharoitda o‘qib o‘rganishi, bilim olib, yuksak ma’naviyatli, salohiyatli avlodni yuzaga chiqarishdek xayrli va ezgu maqsad turadi. Aslo undan boshqasi emas.
Oltinsoylik tadbirkor Jamshid Pardayev tomonidan beg‘araz yordam sifatida yangidan qurib berilgan 48-sonli maktabning 630 o‘rinli binosi foydalanishga topshirilishida ham ayni maqsad mushtarak. Ayni ayyom arafasida ushbu ta’lim maskanining foydalanishga topshirilishi ham bayramga ajoyib tuhfa bo‘ldi. Tadbirda viloyat hokimi Ulug‘bek Qosimov, nuroniylar, viloyat faollari, ta’lim tizimi mutasaddilari hamda o‘qituvchi va o‘quvchilar ishtirok etdi.
Viloyat rahbari maktab 1-oktabr — o‘qituvchi va murabbiylar kuni bayramiga haqiqiy tuhfa bo‘lganini ta’kidlab, tadbirkorning ota-onasiga minnatdorchilik bildirdi. Tadbir ishtirokchilari maktabda yaratilgan sharoitlar bilan tanishishdi.
Zamonaviy talablar asosida barcha sharoitlar bilan ta’minlangan maktabda intellektual sinfxonalar, sport zal, mini stadion, kutubxona, majlislar zali, kompyuter sinfxonalari hamda oshxona barpo etilgan. Bir so‘z bilan aytganda maktabda o‘quvchi va o‘qituvchilar uchun barcha qulayliklar yaratilgan.
A.Safarova
