Ma’lumki, Surxondaryo viloyati mamlakatimizning yirik sayyohlik salohiyatiga ega qadimiy hududlaridan biri sanaladi. Vohaning o‘tmishdan saqlanib qolgan noyob tarixiy obidalari, arxeologik yodgorliklari, maftunkor tabiat manzaralari, milliy hunarmandligi qadamjo va ziyoratgohlari tashrif buyurgan sayyohlarga katta qiziqish uyg‘otib kelayotir.
Shuningdek, mehmonlar tashrif chog‘ida vohamizning betakror manzaralari-yu turistik salohiyatidan bahramand bo‘lishmoqda. Bundan tashqari, har yili vohamizga tashrif buyuradigan sayyohlarning soni kun sayin ortib bormoqda.
Kuni kecha Yaponiyaning Tokio shahrida “Tourism Expo Japan 2024” xalqaro turizm yarmarkasida O‘zbekiston delegatsiyasi tarkibida Surxondaryo viloyati hokimining o‘rinbosari Jo‘rabek To‘rayev boshchiligida viloyat turizm sohasi vakillari ham faol ishtirok etdi. Xalqaro ko‘rgazmada yurtimiz, xususan, Surxon vohasining noyob tarixiy obidalari, arxeologik yodgorliklari, milliy hunarmandchiligi, maftunkor tabiati manzaralari dunyoning yuzga yaqin davlatidan tashrif buyurgan turoperator va kompaniyalar vakillarida katta qiziqish uyg‘otdi.
Shuningdek, xalqaro turistik kompaniyalar bilan o‘zaro sayyohlarni jalb qilish, turpaketlar, turistik yo‘nalishlar ishlab chiqish, jahonning ilg‘or turizm tajribalarini vohamizga jalb qilish bo‘yicha 20 dan ortiq kelishuvlarga erishildi.
D.Qo‘zimurotova
