Surxon yoshlari Toshkentda

Bugun yoshlarning fikri, talab va takliflariga jiddiy e’tibor qaratiladi. Asosiysi, ular ertangi kunga umid va ishonch bilan boqishlari, o‘zlarini shu vatanga, yurtga daxldor, kerakli inson deb his etishlari lozim. Shu sababdan ham yoshlarimiz taqdiriga qiziqamiz, ularning ko‘ngliga qo‘l solib, orzu va maqsadlarini amalga oshirishga harakat qilamiz. Surxondaryo viloyatida ham tez-tez tadbirlar, uchrashuvlar, yoshlar bilan muloqotlar tashkil etiladiki, viloyat hokimining shaxsan o‘zlari yigit-qizlar bilan dildan suhbatlashib, ularga quloq tutadilar. Ana shunday uchrashuvlardan birida aytilgan murojaat o‘z ijobatini topib, Surxondaryo viloyat hokimi tashabbusi bilan bir guruh faol yoshlar Toshkent shahriga tashrif buyurdi.
Tashrif davomida Yoshlar ishlari agentligi direktori A.Sa’dullayev bilan uchrashuv oʻtkazildi. Uchrashuv davomida viloyatni rivojlantirish uchun yoshlar oʻz taklif va loyihalarini taqdimot qilishdi. Turli xil savol-javob va muhokamalarga boy boʻlgan suhbatdan soʻng, yosh mehmonlar Yoshlar ijod saroyiga tashrif buyurdilar. U yerdagi “Ibrat farzandlari”, “Ustoz AI”, “Mutolaa” loyihalarining taqdimoti va rejalari eshitildi. Ayni loyihalarni rivojlantirish maqsadida yoshlar o‘zlarining taklif va tashabbuslari bilan o‘rtoqlashdilar.