10 ta mahallada…

Surxondaryo viloyati hokimi Ulug‘bek Qosimov Muzrabot tumanida bo‘lib, og‘ir hudud sifatida tanlab olingan, yoshlar ko‘chalari tashkil etiladigan 10 ta mahallada infratuzilmani yaxshilash ishlariga start berish tadbirida ishtirok etdi. Su bilan birga, baliqchilikni rivojlantirish loyihalari taqdimoti bilan tanishdi.
Xususan, tanlab olingan mahallalarda obodonlashtirish, ko‘kalamzorlashtirish, chiqindilarni olib chiqish, ariq va zovurlarni tozalash, yoshlar ko‘chalarini namunali tartibda tashkil etish bo‘yicha mutasaddilarga vazifalar belgilab berildi. Tadbirga jalb qilingan texnikalar biriktirilgan hududlarda ishni boshladi.
Shundan so‘ng, viloyat rahbari tumanning Mehrigiyo mahallasi hududida tashkil etilishi rejalashtirilgan baliqchilik loyihasi taqdimoti bilan tanishdi. O‘nga yaqin hovuzlarda tashkil etiladigan loyiha doirasida ma’muriy bino, laboratoriya, baliq sotish do‘konlari, ozuqa ombori va boshqa ob’ektlarni qurish ham ko‘zda tutilgan.
Viloyat rahbari loyiha taqdimoti bilan tanishib, hududning mavjud imkoniyatlaridan kelib chiqqan holda loyihani yanada takomillashtirish lozimligini qayd etdi hamda ish o‘rinlari soni va mahsulot yetishtirish hajmini yanada ko‘paytirish mumkinligini ko‘rsatib o‘tdi.