“Men ham davlat xizmatchisi bo‘laman”

Yoshlar o‘qib o‘rganishni, o‘z tanlagan kasbining sir-asrorlarini bilgan holda jamiyatga, sohaga naf keltirishni ko‘zlashadi. Halollik, shaffoflik ularning bosh me’zoni ekanligini faoliyatlari davomida bilish, sezish mumkin. Shu ma’noda yoshlar hayotining turli bosqichlaridan zinama-zina ko‘tarilib borishar ekan, tasavvurlarida o‘zlarini qanday kadr bo‘lishlari haqida o‘z fikrlari bo‘ladi. Surxondaryoda “Men davlat xizmatchisi bo‘laman” mavzusida o‘tkazilgan insholar tanlovida ana shunday tasavvurlar qog‘ozga ko‘chdi.
Prezident huzuridagi Davlat xizmatini rivojlantirish agentligi Surxondaryo viloyati filiali tashabbusi va Surxondaryo viloyati Maktabgacha va maktab ta’limi boshqarmasi hamkorligida tashkil etilgan tanlovning viloyat bosqichida hududiy bosqichlardan g‘olib bo‘lgan 30 nafar yosh ishtirok etdi. Tanlov yoshlar ongida davlat fuqarolik xizmati to‘g‘risida dastlabki tushunchalarni shakllantirish, sohaga ularning qiziqishini oshirish va huquqiy bilimlarini yanada takomillashtirish maqsadida tashkil etilgan emasmi, shu sababdan ijodiy ishlarda xalqparvarlik, halollik va birdamlik g‘oyalari ustunlik qildi.
Natijalarga ko‘ra, Jarqo‘rg‘on tuman 21-maktab o‘quvchisi Malohat Turdimurodova 1-o‘ringa loyiq topildi.