Harbiylarga yangi xonadon kalitlari topshirildi

Uy — vatan ichra kichik bir vatandir. Yaqinlarimiz bilan baxtli va sinovli kunlarimizga guvoh bo‘ladigan boshpanagina insonga bir olam xotirjamlik baxsh etadi. “O‘z uying, o‘lan to‘shaging” deya bejizga aytishmagan axir. Qay sohada faoliyat yuritmaylik, qayerda bo‘lmaylik, o‘z uyimiz, boshpanamiz bo‘lishiga intilamiz. Shu ma’noda harbiy xizmatchilarning ijtimoiy himoyasini kuchaytirish bo‘yicha belgilangan vazifalar ijrosini ta’minlash maqsadida Muzrabot tumanida Davlat xavfsizlik xizmati Chegara qo‘shinlariga qarashli harbiy qismlarning birida harbiylar uchun yangi xonadonlar foydalanishga topshirildi.
Tantanali tadbirda Muzrabot tumani hokimi Abdurashid Ismailov, tuman sektor rahbarlari, Chegara qo‘shinlari rahbariyati, harbiy pensionerlar, nuroniylar, harbiy xizmatchilarning oila a’zolari hamda mutasaddilar ishtirok etishdi. Tuman hokimi harbiy xizmatchilar va ularning oila a’zolariga yangi xonadon kalitlarini tantanali topshirdi. Shuningdek, nuroniylar va mutasaddilar bilan harbiylarga topshirilgan yangi xonadonlarda mehmon bo‘lishib, yaratilgan shart-sharoitlar bilan tanishishdi.
Mazkur loyihaning umumiy qiymati 13 milliard 200 million so‘m bo‘lib, zamonaviy sharoitlarga ega, ikki qavatli, 16 ta xonadonga mo‘ljallangan ko‘p qavatli uylar, vzvod ma’muriy binosi, sport maydonchasi, maktabgacha ta’lim muassasasi va harbiy xizmatchilarning turmush o‘rtog‘larini bandligini ta’minlash maqsadida tikuvchilik sexi bunyod etilgan.
Ana shunday xursandchiliklar sherobod tumanida ham davom etdi. Sherobod tumani “Chorbog” mahallasida joylashgan harbiy qism xizmatchilariga ham 18 ta ko‘p qavatli xonadonlar tantanali topshirildi.