Qashqadaryoliklar Angorda tajriba oshiradi

Har bir sohada tajriba almashish, ilg‘or va muvaffaqiyatga erishgan tajribalarni o‘rganish va amaliyotga joriy etish yaxshi natija beradi. Shu ma’noda, Surxondaryo viloyati fermer va dehqonlari qishloq xo‘jaligi sohasida katta tajribaga egaki, bu bozorlarimizda sifat va narx-navo uyg‘unligida ko‘zga tashlansa, eksport salohiyatimiz ham tajriba sirlarini ochiqlagandek bo‘ladi.
Qashqadaryo viloyatining Qamashi, Kitob va Gʻuzor tumanlari hokimlari rahbarligida mutasaddi tashkilot rahbarlari tajriba almashish maqsadida Angor tumaniga tashrif buyurdilar. Tashrif chog‘ida mehmonlarni viloyat hokimi o‘rinbosari Sherzod Rajabov hamda Angor tumani hokimi Qosim Mardonov kutib oldilar.
Mehmonlar “Bahor”, “Ilg‘or” mahallalarida olib borilayotgan qishloq xo‘jaligi sohasidagi ishlar bilan tanishdilar. Xususan, aholi tomorqalarida yetishtirilayotgan qishloq xo‘jaligi mahsulotlarining eksport jarayonlarini ko‘zdan kechirdilar. Shuningdek, mehmonlar “Bahor” mahallasida joylashgan “Top Quality Brand” korxonasining charmdan poyabzal va charm attorlik mahsulotlari ishlab chiqarish loyihasi bilan tanishdilar.