Oʻzbekistonga ilk bor chiqindi tashiydigan elektromobil olib kelindi

Ekologiya, atrof-muhitni muhofaza qilish va iqlim oʻzgarishi vazirligi tashabbusi bilan endi yurtimizda chiqindi tashishda elektrda yurishga moʻljallangan texnika vositasidan foydalaniladi. Elektromobil “Eko House” chiqindi klasteri tomonidan Xitoydan keltirildi. Ushbu elektromobil atmosferaga mutlaqo zararsiz bo‘lib, Oʻzbekiston ham aynan shu jihatiga eʼtibor qaratdi. Elektromobil Xitoyning Chenju shahrida ishlab chiqarilgan. Kelgusida chiqindi tashiydigan mana shunday elektromobillarni Oʻzbekistonda ishlab chiqarishni reja qilinmoqda.
Elektromobil dastlab Jizzax viloyatida sinovdan oʻtkaziladi. Eʼtiborli tomoni, u tor koʻchalarda ham yurishga moʻljallangan. Mashina toʻliq quvvatda 300 kilometr masofani bosib oʻtadi. Bu esa kun davomida aholi yashash punktlaridan chiqindilarni olib, maxsus poligonlarga tashish imkonini beradi. Shuningdek, 3 tonnagacha yukni bemalol koʻtara oladi.