Zakovati sinovdan o‘tdi

“Zakovat” intellektual o‘yini yoshlar hayotida tub burilish yasab, ko‘plab iqtidor, salohiyatlarni yuzaga chiqarishga xizmat qilayotir. Bugun maktabu mahallalarda, oliygohlaru har bir sohalarda faoliyat olib borayotgan yoshu katta o‘z bilimini “Zakovat”da sinab ko‘rmoqda. “Besh tashabbus” olimpiadasi doirasida mahallalar o‘rtasida “Zakovat” intellektual o‘yinining Surxondaryo viloyat bosqichi ham ana shunday yoshlarni kashf qilishga xizmat qildi.
Termiz shahridagi Yoshlar markazida bo‘lib o‘tgan turnirda 15 ta tuman (shahar) lardan kelgan jamoalar ishtirok etdi. Avvaliga o‘yin shartlari va talablari, asosiy qoidalar tushuntirib o‘tildi. Shundan so‘ng, savollar va uning javoblari o‘qib eshittirildi. O‘yin qiziqarli, hayajonli voqealarga boy bo‘ldi. Muhimi ishtirokchi jamoalar o‘zlarining bilimlarini, salohiyatlarini sinovdan o‘tkazdilar.
Yakuniy natijalarga ko‘ra 3-oʻrin Angor tumani “Qadimiy Angor” jamoasiga, 2-oʻrin Termiz tumani “Uchqizil MFY” jamoasiga va 1-oʻrin esa Qumqo‘rg‘on tumani “Guliston MFY” jamoasiga nasib etdi. Ushbu jamoalar tanlovning respublika bosqichiga yo‘l olishdi.