Bepul tibbiy ko‘rik tashkil etildi

Issiq jonni isitmasi bor deganlaridek, har bir insonni o‘ziga yarasha sog‘ligi bilan bog‘liq muammolarga duch keladi. Ammo, o‘z vaqtida shifokor qabuliga borishga vaqt yoki mablag‘ topilavermaydi. Shu bois, aholi ehtiyojini o‘ylagan holda BMTning migratsiya hamkorligi loyihasi doirasida Termiz shahridagi “Jo‘yijangal” mahallasida “Barqaror hayot” xalqaro ijtimoiy ma’rifat markazi tashabbusi bilan bepul tibbiy ko‘rik tashkil etildi.
Tibbiy ko‘rikka mahalladagi ijtimoiy himoyaga muhtoj, “Ayollar daftari” va “Temir daftar”ga kiritilgan hamda nogironligi bo‘lgan 30 nafardan oshiq fuqaro ishtirok etdi. Ko‘rikka kelganlar UZI, EKG apparatlaridan tekshiruvdan o‘tish bilan birga kardiolog, pediatr, psixolog, terapevtlar tomonidan tibbiy ko‘rikdan o‘tkazilib,kerakli maslahatlarni olishdi.
Ancha paytdan buyon bel sohasida kuchli og‘riq bor edi. Imkoniyatim yo‘qligi bois og‘riq bilan shu kungacha chidab yuribdim, — deydi Dilnoza Xayitaliyeva. — Mahallamizda bepul tibbiy ko‘rik tekshiruviga charqirishganida xursand bo‘ldim. Bunday imkoniyatdan unumli foydalanish maqsadida ish vaqtim bo‘lishiga qaramay, shoshilib kelaverdim. Tashkilotchilariga o‘z minnatdorligimni bildiraman.
Dinara Qo‘zimurotova