TerDU kimyogar olimlari Pragada

Ilm-fan rivoji uchun tajriba almashish, malaka oshirish, yangidan-yangi texnologiya va innovatsiyalarni qo‘llash bugungi davrning talabidir. Ilm ahli borki, ayni jihatlarni inobatga oladi. Termiz davlat universitetining bir guruh kimyogar olimlari Praga shahrida bo‘lib o‘tayotgan “Yevropa universitetlarida ta’lim jarayonidagi innovatsiyalar” mavzusidagi o‘quv-amaliy seminarida faol ishtirok etishdi. Shuningdek, ular Chexiya Respublikasi Fanlar akademiyasining Geyrovskiy nomidagi fizikaviy kimyo institutining ilmiy laboratoriyalari bilan yaqindan tanishdilar.
Chexiya Respublikasidan 2 nafar olim Nobel mukofotiga sazovor bo‘lgan bo‘lsa, ulardan biri kimyogar olim Y.Geyrovskiydir. Kimyogar olimlarimiz professor Y.Geyrovskiy tomonidan ishlab chiqilgan tarixiy polyarograf bilan tanishdilar va ushbu institut olimlari bilan hamkorlikda ilmiy-tadqiqot ishlari olib borish, xalqaro loyihalarda qatnashish, nufuzli jurnallarda ilmiy maqolalar chop etish hamda yosh olimlarning qisqa muddatli ilmiy stajirovkalarini tashkil etish bo‘yicha kelishib oldilar.