Vatan ostonadan boshlanadi. Shuning uchun ham uning har qarich yerini, tuprog‘i-yu sarhadlarigacha muqaddas bilib asrab-avaylaymiz. Jonimizni-da tikamiz. Vatanparvarlik, vatanga xizmat qilish jangga kirish yoki sarhadlarni himoya qilish bilan kifoyalanmaydi. Ijodda, ilm-u fanda, san’atda, xullas hayotimizning har jabhasida fidokorona xizmat qilish ham vatanparvarlikdir.
Har bir harakatimiz, so‘zimiz, amalimiz, targ‘ibot-tashviqotimiz bilan xizmatga shay bo‘lsak, demak biz to‘g‘ri yo‘ldamiz. Hattoki, yurtimizda keng quloch yozib, o‘tkazib kelinayotgan “Vatan ostonasi” shiori ostidagi maʼnaviy-maʼrifiy tadbirlarda ham ana shunday maqsad mujassam. Ayni tadbirlar Surxondaryo viloyatida ham ko‘tarinki ruhda tashkil etilib, harbiy xizmatchilarni, qolaversa, voha ahlini vatanparvarlikka chorlab kelayotir.
Shu asosida chegaraoldi mahallalarda yashovchi yoshlarni turli yot g‘oyalar girdobiga tushib qolishini oldini olish, ularni Vatanga muhabbat, milliy va umuminsoniy qadriyat hamda anʼanalarga hurmat, istiqlol g‘oyalariga sadoqat ruhida tarbiyalash maqsadida uchrashuv va tadbirlar o‘tkazish maqsadida “Maʼrifat” targ‘ibotchilar jamiyati aʼzolari, shoir va yozuvchilar, olimlar va sanʼatkorlardan iborat ijodiy guruh Surxondaryo viloyati Termiz xalqaro aeroportida samimiy kutib olindi.
Shundan so‘ng, mehmonlarning bir guruhi Termiz shahridagi “Yosh chegarachilar” harbiy-akademik liseyida bo‘lishdi. U yerda o‘tkazilgan tadbir ko‘tarinki ruhda davom etdi. Unda “Maʼrifat” targ‘ibotchilar jamiyati aʼzolari, harbiylar hamda vatanimizning ertangi himoyachisi bo‘lgan yosh chegarachilar ishtirok etdi.
Tadbir davomida mamlakatimizda amalga oshirilayotgan islohotlarning mazmun-mohiyati haqida mutaxassis olimlar ma’ruza qildilar. San’atkorlar tomonidan ijro etilgan kuy-qo‘shiqlar hammaga xush kayfiyat bag‘ishladi.
