Bayramga tuhfa: yangi maktab ish boshladi

Vatanimiz mustaqilligining o‘ttiz ikki yilligi shodiyonalari arafasida Termiz tumanida qator ijtimoiy soha bonolari, xizmat ko‘rsatish va kommunal soha obyektlari qatorida 528 o‘rinli, zamonaviy tipda qurilgan, uch qavatli 14-sonli maktab binosi foydalanishga topshirildi. Ushbu maktab tumandagi “Guliston” mahallasi hududida qad rostlagan bo‘lib, loyiha qiymati 15,6 milliard so‘mni tashkil etdi. O‘quv yilini yangi maktabda boshlashidan o‘g‘il-qizlarning va gulistonliklarning quvonchi cheksiz. Asosiysi, maktabda barcha shart-sharoitlar yaratilgan, sinfxonalar keng va yorug‘, barcha kerakli jihozlar bilan ta’minangan.
Maktab binosining foydalanishga topshirilishi ham katta bayramga ulanib ketdi. Tantanali tadbirda tuman hokimi Shuhrat Nazarov ishtirok etib, yig‘ilganlarni Vatanimiz mustaqilligining o‘ttiz ikki yilligi bayrami bilan qutladi va bayram arafasida foydalanishga topshirilayotgan mazkur maktabning ishga tushirilishi hudud aholisi uchun bayram tuhfasi bo‘lishini ta’kidladi. Tuman hokimi, nuroniylar, faollar va mutasaddilar bilan maktabda yaratilgan sharoitlar bilan tanishdi va yangi o‘quv yilida 1-sinfga qabul qilinayotgan o‘quvchilarga “Prezident sovg‘alari” topshirildi.