O‘quvchi-qizlarning 3 yoshgacha farzandi bo‘lsa…

Bugungi kunda yoshlarning, xususan, xotin-qizlarning o‘qib o‘rganishlari, kasb-hunar egallashlari uchun yetarlicha shart-sharoit va imkoniyatlar yaratilgan. 3 yoshgacha farzandi bor kollej va texnikumlar o‘quvchi-qizlariga masofaviy ta’lim olish imkoniyatining yaratilishi fikrimiz isbotidir. Bu haqida Vazirlar Mahkamasining “Kollej va texnikumlarda kasb va mutaxassislik egallash istagida bo‘lgan xotin-qizlarni qo‘llab-quvvatlash chora-tadbirlari to‘g‘risida”gi qarori loyihasi e’lon qilindi.
Loyihaga ko‘ra, Oliy ta’lim, fan va innovatsiyalar vazirligi 3 yoshgacha farzandi bo‘lgan kollej va texnikumlar o‘quvchi-qizlariga masofaviy ta’lim olish imkoniyati yaratiladigan kasb va mutaxassisliklar ro‘yxatini tasdiqladi. Ushbu ro‘yxatga ko‘ra 2023/2024-o‘quv yilidan boshlab, kollej va texnikumlarda qurilish, transport, kommunal, qishloq xo‘jaligi va xizmat ko‘rsatish sohalaridagi kasb va mutaxassisliklarda o‘qiydigan 3 yoshgacha farzandi bo‘lgan o‘quvchi-qizlarga, ularning murojaati asosida masofaviy ta’lim olish imkoniyati yaratiladi.