Jurnalist haq gapni aytish, jamiyatdagi og‘riqlarni, muammo va kamchiliklarni fosh etib, aholi hayotini yaxshilash uchun xizmat qiladigan kasb sohibidir. Ularning faoliyati xalq bilan bevosita bog‘liq. U manfaat, adovat ko‘zlamaydi. Xolislik ila xizmat qilishni sharaf deb biladi. Har yili 27-iyun – Matbuot va ommaviy axborot vositalari xodimlari kuni yurtimizda keng nishonlanib, soha vakillarining xizmati e’tirof etiladi. Ayni shu munosabat bilan Qiziriq tuman hokimligida tumandagi faxriy jurnalistlar, bugungi kunda faoliyat olib borayotgan OAV vakillari hamda blogerlar ishtirokida tadbir bo‘lib o‘tdi. Tadbirda Qiziriq tuman hokimi Sh.Rajabov jurnalistlarni bayram bilan muborakbod etib, mashaqqatli va sharafli kasblariga omad tiladi. Qolaversa, tumandagi ijtimoiy, siyosiy, madaniy va boshqa barcha yangiliklardan boxabar qilib kelayotgan, faoliyati davomida ko‘plab yutuqlarga erishgan, hamkasblariga o‘rnak bo‘lib kelayotgan jurnalistlarga uzoq yillik fidokorona xizmatlari, samarali mehnatlari uchun tuman hokimligining faxriy yorlig‘i va esdalik sovg‘alarini topshirdi. OAV vakillari bilan suhbat esa bir piyola choy ustida davom etdi.
Sohibjamol
