Yo‘llar nosoz bo‘lsa, ta’mirtalab bo‘lsa, manzilga yetish uchun haydovchining sabri sinalishi aniq. Bu esa vaqtimizni o‘g‘irlashi bilan birga, avtoulovimizning sozligiga ham ta’sir etmay qolmaydi. Ayniqsa, M39 avtomagistralining Surxondaryo viloyati hududidan o‘tuvchi qismini M41 avtomagistrali bilan tutashtiruvchi Darband-Denov yo‘nalishidagi avtomobil yo‘li uzoq yillardan buyon nosoz, ta’mirtalab bo‘lib qolgani aholining, shu yo‘ldan qatnaydigan haydovchilarning haqli e’tirozlariga sabab bo‘layotgan edi.
Yo‘lsozlikka alohida e’tibor qaratilib, ichki va tashqi yo‘llarimizda diqqatga sazovor ishlar amalga oshirilayotgan bir paytda, albatta, ushbu e’tirozlar ham inobatga olindi. M41 avtomagistrali bilan tutashtiruvchi Darband-Denov yo‘nalishidagi avtomobil yo‘li bo‘yicha soha mutasaddi va mutaxassislari tomonidan aniq vazifalar belgilab olindi. Va ushbu yo‘l zamonaviy va barcha qulayliklarga ega bo‘lgan holda qayta qurish reja qilindi. Shundan so‘ng esa Ozarbayjon davlatining “LANKARAN YOL TIKINTI” xalqaro qurilish tashkiloti tomonidan bunyodkorlik ishlari boshlab yuborildi.
S.Davlatova
