Hamma ham talaba bo‘lishga muvaffaq bo‘lavermaydi. Turli sabablar va bilimning yetishmasligi bu borada eng katta to‘siq bo‘ladi. Bu esa hammasi tamom degani emas. Hayot esa davom etaveradi. Demak, jamiyatda o‘z o‘rnimizni topishimiz uchun boshqa yo‘llarni izlashimiz, imkoniyat eshiklarini ochishimiz shart va zarur. Muzrabotlik Samandar Aliyev ham xuddi shunday qildi. Oliygohga o‘qishga kira olmagach, bir muddat chet elga ishladi. Ammo, bu uning ishi emasligini tushunib yetdi, ming harakat qilmasin, harakatlari o‘xshamagach, yurtga, uyga qaytdi.
Ishsiz emasmi, yoshlar yetakchisining maslahati va ko‘magi bilan “Yoshlar daftari”ga ro‘yxatga olinib, auksion orqali 10 yil muddat mobaynida foydalanish uchun 20 sotix yerga ega bo‘ldi. Ushbu yer maydoniga bor mehrini qo‘yib, qunt bilan mehnat qildi. Dehqonchilik orqasidan birinchi yiliyoq 30 million so‘m foyda ko‘rdi. Bu esa Samandarni ruhlantirgani, ishiga e’tiborini kuchaytirgani rost. Endi u bundan-da ko‘proq daromad olishga qodir ekanini isbotlash maqsadida rejani katta olgan. Albatta, ko‘plab yoshlarga ana shunday imkoniyatlar eshigini ochayotgan “Yoshlar daftari” loyihasi davom etmoqda.
H.Kamolova
