Pandemiya sharoiti sabab masofadan turib ishlash nima ekanini bildik. Aslida esa ana shunday global sharoitlarsiz ham masofadan turib ishlash mehnat qonunchiligida ko‘rsatib o‘tilgan. Buning uchun faqat masofadan turib ishlash mehnat shartnomasida belgilangan bo‘lmog‘i lozim. Mehnat shartnomasida mehnat vazifasini ish beruvchi joylashgan yerdan, tashkilotning alohida tuzilmasidan (shu jumladan boshqa erda joylashganlaridan) ish beruvchining bevosita yoki bilvosita nazoratida bo‘lgan statsionar ish joyidan, hududdan yoki obyektdan tashqarida bajarishdan iborat bo‘lib, mazkur mehnat vazifasini bajarish hamda uni bajarish bilan bog‘liq masalalar bo‘yicha ish beruvchi bilan xodim o‘rtasida hamkorlikni amalga oshirish uchun axborot-telekommunikatsiya tarmoqlaridan, shu jumladan Internet jahon axborot tarmog‘idan foydalanish shart bo‘ladi.
Xodimni ishga qabul qilishda, xodim odatdagi ish rejimidan masofadan turib ishlash rejimiga o‘tkazilgan taqdirda masofadan turib ishlash rejimi belgilanishi mumkin. Bunda ish beruvchida ishlayotgan shaxsning avvalgi mehnat vazifasini davom ettirgan holda odatdagi ish rejimidan masofadan turib ishlash rejimiga o‘tkazilishi mehnat shartlarining o‘zgarishidir. Xodimning odatdagi ish rejimidan masofadan turib ishlash rejimiga o‘tkazilishi, agar bunda xodimning mehnat vazifasi o‘zgarsa, boshqa ishga o‘tkazish hisoblanadi. Ana shunday shartlarda tomonlarning o‘zaro roziligiga erishilar ekan, masofadan turib ishlash uchun shartnomani imzolashlari mumkin.
Manbalar asosida S.Davlatova tayyorladi
