Talabalar har kuni maroqli o‘tishini, yangi bilimlar olishni istaydi. Shuning uchun ham har bir dars mashg‘ulotlaridan yangilik, motivatsiya kutadi. Bu esa o‘qituvchi-pedagogdan o‘z ishiga mas’uliyat bilan yondashmoqni, fanga puxta tayyorgarlik ko‘rmoqni talab etadi. Termiz davlat universitetining talabalari ham erta tongdan ana shunday kayfiyat bilan oliygohga qadam qo‘yishdi. Ularni auditoriyada notanish o‘qituvchi, professor Ma Jian kutib oldi. Turgan gapkiyigit-qizlarning qiziqishi ortdi.
Dars boshlandi. Mavzu esa “Qadimgi insoniyat va tabiat o‘rtasidagi munosabatlar” haqida. Professor mavzuga shu qadar sho‘ng‘ib ketdiki, tarjimon ham tarjima qilishda professordan qolishmadi. Talaba-yoshlar esa yangidan-yangi ma’lumotlarni jon quloqlari bilan tinglab, o‘zlari uchun qayd etib borishdi. Taassurotlar esa a’lo.
Mana shunday dars mashg‘ulotlarida muntazam qatnashib turish yoshlarning fan sirlarining yangi qirralarini kashf etishlariga sabab bo‘ladi. Qolaversa, Termiz davlat universiteti va Xitoyning shimoli-g‘arbiy universiteti o‘rtasida 2 yilga mo‘ljallangan dastur imzolanishi kutilayotir. Shu bilan birga talabalar almashinuvi, stajyor va doktorantlarni ikki taraflama almashuv asosida o‘qitish hamda o‘qituvchilarning malaka oshirishi ko‘zda tutilgan.
H.Baxtiyorova
